Elke dag van ons lewe gee die Here ons ‘n keuse om Hom te dien.  Elke dag word ons getoets en so dikwels faal ons met kwaade gevoelens, ongeloof, ongehoorsaamheid ens.  In so ‘n oomblik kom ‘n mens alweer met arms hopevol skuld i.p.v. wierook, mirre en goud en kniel voor die Jesuskind neer.  Jou hart sing Stillenag maar jou gewete maak dat daar nie ‘n noot oor jou lippe kom nie.  Maar God se genade is groot.  HY sê:  "My kind, kom sit hier op Pappa se skoot, en kyk na die krippie, hy gooi ‘n skadu in die vorm van ‘n kruis, want jy sien die prys is klaar betaal."

Die grootste geskenk wat jy nou kan gee is jouself.  Bied jouself vir hierdie Jesuskind.  Dit beteken jou tyd, geld, jou liggaam.  Ja, alles!  ALLES BEHOORT NOU AAN HOM!

Jy kan die liedjie aflaai en met ander deel.  Let egter daarop dat dit by SAMRO geregistreer is in my naam en my kopiereg is.

Laai "Stil Sing Ek Stillenag" af
(party web blaaiers speel nie die hele liedjie as jy daarop kliek nie - laai dit dan eerder af deur te regs-kliek op die skakel en stoor dit op jou rekenaar vanwaar jy die hele liedjie kan terugspeel)


Stil Sing Ek Stillenag
 
(woorde: JM Taljaard, musiek: JM Taljaard)
 
My God, My God, ek moes weer kies
Tussen die donker, die verblydende lig
Maar met my mensehande, my Godgegewekleed
Bevlek met sonde voete in die donkerte gerig.

KOOR:

En stil sing ek stillenag want hier is ek nou al weer
Voor die krippie kniel ek neer
En stil sing ek Stillenag
Ag, Jesus kleintjie teer, ek le alweer my sondes voor jou neer!
(DIS TOE DAT EK JUIS OPKYK, EN SIEN DIE SKADU VAN SY KRUIS)

My God, my God, met genade groot
Knus en warm sit ek hier op U skoot
Met U liefde wat my wese omvou in genade
Ja, dit is my behoud.